Галина Николаевна Уус Алдан улууһугар Найахы нэһилиэгэр төрөөбүтэ.Найахы орто оскуолатын, Дьокуускайдааҕы култуурунай-сырдатар училищены бүтэрэн, Анаабыр оройуонун Үрүҥ Хайа бөһүөлэгэр Култуура Дьиэтин дириэктэринэн, оҕо тэрилтэтигэр музыкаҕа салайааччынан уонтан тахса сыл айымньылаахтык үлэлээбитэ. 1996 сылтан өрөспүүбүлүкэтээҕи Бэтэрээннэр Сэбиэттэригэр үлэлээбитэ.

         Айымньылара “Чуораанчык”, “Далбар хотун “ сурунаалларга бэчээттэммиттэрэ. “Уһун Уйбаан” олоҥхотун кинигэтэ улуус библиотекаларынан тарҕаммыта. Саха народнай суруйааччыта С.С. Яковлев-Эрилик Эристиин Маарыкчаан ыччаттара сэһэнинэн пьеса сценарийын суруйан холоммута.

         РФ суруналыыстарын Сойууһун, СӨ суруйааччыларын Сойууһун чилиэнэ.

Дорообо, Эбэккэм

Ыраахтан алаадьы кэһиилээх,

Үргүлдьү Эбэбэр ааһабын,

Уҥуоргу биэрэги одуулаан,

Эҕэрдэ тыллары этэбин.

            Дорообо, төрөөбүт Найахым

            Дорообо, тапталлаах Эбэккэм,

            Дууһалыын долгуйа үөрэммин,

            Ахтылҕан тылларын ааттыыбын.

Тапталлаах эбэккэм барахсан

Мундута, собото бөдөҥүн.

Сөтүөлүүр, сынньанар кэмнэргэ

Уута ырааһа, сөрүүнүн.

            Үйэлэр тухары аһатар

            Килбэйэр уулаах эбэбит

            Дьалкыйар уута уолбатын,

            Киртийэ-хомойо сыппатын.

Алаадьы

 Абыраллаах ас алаадьы,

Оҕолорго алаадьы,

Ыалдьыт буоллун алаадьы,

Үтүө аспыт алаадьы.

Малааһын буоллун – алаадьы,

Кийиит кэллин – алаадьы,

Сыбаайбаҕа алаадьы,

Үтүө аспыт алаадьы.

Сиргэ-уокка – алаадьы,

Өйүө ыһык – алаадьы,

Сүөгэйдээх алаадьы

Үтүө аспыт алаадьы.

Эдэркээн эрдэххэ

 Эдэркээн эрчимнээх эрдэххэ

Эйэҕэс-сайаҕас этибит,

Эриирдээх-мускуурдаах олохтон

Элбэҕи эрэнэ күүтэрбит.

Ыарахан сылаалаах үлэттэн

Толлубат, чаҕыйбат этибит,

Туруору сыырдары дабайар

Толору соруктаах сылдьарбыт.

Тапталы таҥара оҥостон,

Үрдүктүк, ыраастык саныырбыт.

Ким кими таптыырын эппэккэ

Сүрэххэ иҥэрэн сылдьарбыт.

Эдэркээн эрчимнээх эрдэххэ

Эйэҕэс-сайаҕас этибит,

Эриирдээх-мускуурдаах олохтон

Элбэҕи эрэнэ күүтэрбит.