1939 с. Найахыга 4 оҕолоох дьиэ кэргэҥҥэ төрөөбүтэ. «Сталин» холкуоска ньирэй көрөн, ыанньыксыттаан, «Коммунистическай үлэ удаарынньыга» буолбута. 1961 сылтан сиэстэрэлэр куурустарыгар үөрэнэн, Найахы учаастактааҕы балыыһатыгар 1998 сылга диэри медсиэстэрэнэн үлэлээбитэ. £р сылларга балыыһа профкомун  бэрэссэдээтэлинэн үлэлээбитэ. Оройуоҥҥа хайыһар күрэҕэр, өрөспүүбүлүкэҕэ маҥнайгы ыччат бэстибээлигэр үҥкүүһүттэр бөлөхтөрүгэр кыттыбыта. Найахы норуодунай хорун бастакы көлүөнэ ырыаһыта, үҥкүүһүтэ, бэтэрээнэ. Нэһилиэккэ хомсомуол хамсааһынын актыбыыһа. Сааһырдар даҕаны, хайыһарынан, скандинавскай хаамыынан дьарыктанара. Билигин сахалыы таҥаһы, таҥас кырадаһыннарынан араас оһуордары тигэр, симэхтэри, киэргэллэри оҕорор. Кыралаан тыллары кэккэлэтэн, хоһоон айарга холонор. Оҕолорун, сиэннэрин бүөбэйдэһэр. СР Доруобуйатын харыстабылын туйгуна, нэһилиэк бочуоттаах олохтооҕо.

 

Найахым бөһүөлэгэ

Ыллам-дьэллэм дьоннордоох,

  Үлэ-ырыа аргыстаах

Найахым сиригэр

Үүнэн-үөскээн олоробун.

            Кэрэҕин, нарыҥҥын бүөбэйдээн,

            Саҥата суох иһийэн олоробун.

            Үгүс-элбэх сылларга

            Үөрэнэн, үлэлээн аастаҕым.

Эн нарын биһиккэр уйдаран,

Үлэһит ыччат үүннэҕэ.

Эн дьэҥкир ыраас уугар

Сөтүөлээн, сынньанан аастаҕа.

            Оо, кэрэ да Эбэ -

            Балыктааҕым барахсан!

            Ыраас, дьэҥкир уугунан

            Күүс-уох биэрэ сыттаҕыҥ.

 

Сиэннэрбэр

(Кларочкаҕа, Славикка)

 Күн сирин көрөн,

Сыыһы-буору ымньанан,

Сыыһа-халты үктэнэн,

Саһа хааман эрэргит,

Санаабар, бу баарга дылы.

            Кыһаллан-мүһэллэн үөрэнэн,

            Оскуолаҕыт аатын ааттатыҥ.

            Үөрэниҥ, үөрэниҥ

            Дьоллоох олох туһугар.

Үүнэн-сайдан, үөрэхтэнэн,

Дьоһун дьон буола улаатыҥ.

Дойдугут, дьоҥҥут туһугар

Туруулаһан үлэлээриҥ!

            Эбээҕит баҕарар баҕатын

            Куруук өйдүү-саныы сылдьаарыҥ.

            Алгыс тылбын аныыбын:

            Сырдык, чөл олохтоох,

Кэрэ-ыраас санаалаах,

Бастыҥ-мааны үлэһит

Дьоһун ыал дэтээриҥ!

 

Оҕо сааспын санаатым

 Ахтан кэллим сайылыгым сытын,

Сэмэй, нарын майгылаах,

Уу баһар, мас мастыыр

Оҕо сааһым доҕотторун.

            Санаан аастым сайылыкпын

            Аламай күннээх «Абаҕабын»,

            Аймах-билэ дьоннорбун,

            Кыстыыр сирбин «Кириэспин».

 

Гериатрическай центр

            Элиэнэлиир эбэбит

Эҥэрдэрин киэргэлэ,

            Мырааннарын тэллэҕэр

            Ньургуһуннаах хонууга

            Кырдьаҕастар дьиэлэрэ

            Дьэндэһийэн көстөҕүн.

                        Уоттуун-күөстүүн,

                        Эмтиин-томтуун эйэргээн,

                        Итии-сылаас илиилээх,

                        Эйэҕэс-сайаҕас майгылаах,

                        Маҥан халаат нааралаах

                        Маанылаахай кыргыттар

                        Элбээбиттэр да эбиттэр.

            Киирэн-тахсан, дьаһайан,

            Көрөн-истэн бэрийэн,

            Сүүрэн-көтөн эмтээҥҥит

            Үгүс-элбэх киһиттэн

            Үөрүүлэрин үллэстэҕит.

            Кырдьаҕстар кыттыһан

            Баҕарабыт эһиэхэ

            Инникитин даҕаны

            Эмтиир-томтуур идэҕит

            Элбээн, сайдан иһиэхтин!

 

Балыктаахпын таптыыбын

 Бары үлэҕэ дьоҕурдаах

Бастыҥ, үтүө дьоннордоох,

Сыһыы, толоон аайытын

Сылгы-ынах сүөһүлээх -

Бу төрөөбүт бөһүөлэкпит

Бары таптыыр Балыктаахпыт.

Сибэккилээх сыһыылаах,

Чэбдик-ыраас салгыннаах,

Отон, сугун оһуордаах,

Олус элбэх быйаҥнаах -

Бу төрөөбүт бөһүөлэкпит

Бары таптыыр Балыктаахпыт.

Чаҕылыспыт уоттардаах,

Чахчы кэрэ көстүүлээх,

Үлэ-үөрэх аргыстаах

Балыктаахпын таптыыбын.

            Бу төрөөбүт бөһүөлэкпит

           Бары таптыыр Балыктаахпыт.