1952 с. Уус Алдан улууһугар Бороҕоҥҥо күн сирин көрбүтэ. Өнөр, Дүпсүн оскуолаларыгар үөрэнэн, Дьокуускайдааҕы педучилище дошкольнай отделениетын бүтэрбитэ. 1977 сылтан Найахы нэһилиэгин оҕо саадыгар иитээччинэн бочуоттаах сынньалаҥҥа тахсыар диэри үлэлээбитэ. 1978 с. ыал буолбута. Кэргэнэ – Исаков Валерий Владимирович тутуу маастара этэ. 1986 сылтан айар үлэтин саҕалаан, «Үрүмэчччи», «Чыычаах», «Үөрэ сылдьыахха!», «Чыычаахтары таптыыбын» уо.д.а. ырыалара «Хотугу сулус» телевизионнай куонкурустарга ылланан, кыттааччылар лауреат, дипломант буолбуттара. 2003 с. композитор Захар Степановтан «Лучшая детская песня» номинацияны ылбыта. Хоһоонноро, ырыалара «Мүрү саһарҕата» хаһыакка, иитээччилэргэ аналлаах көмө пособиеҕа, «Уус -Алдан мелодистара - ырыалаах поэттар» 2-с кинигэтигэр бэчээттэммиттэрэ.

 

Былыттар

 

Былыттар, былыттар,

Үрүмэ былыттар

Күөх баархат ньууругар

Тэлимнии устаҕыт.

         Оҕо саас оонньуутун,

         Эриэккэс киэргэлин

         Эһиги ойуулаан

         Үөрүүнү үксэтиҥ.

Былыттар, былыттар,

Массыына буолаҕыт.

 Бирилээн-барылаан

«Пи-пииптээн» айаннааҥ.

         Былыттар, былыттар,

         Маҥан ат буолаҥҥыт

Көтүтэ оонньотуҥ

Оҕо-аймах баҕатын.

Былыттар, былыттар

Кыталык буолаҥҥыт

Кылбаҥныы көтөҥҥүт

Эйэ суолун оҥоруҥ.

 

Үрүмэччи

 Дьэрэкээн үрүмэччи

Көтө-дайа оонньооҥҥун,

Бу көмүс айылҕам

Кэрэтин кэпсиигин.

         Үрүмэччи, үрүмэччи

         Күөх халлаан урсунун,

         Тыыннаах сибэкки

         Үүнэрин көрдөрүүй.

Оҕолор үөрэннэр,

Тутаары сүүрэллэр.

Ытыстарын сыыстарын

Сараҥната ууналлар.

         Кэрэчээн үрүмэччи

         Элбэх буолан сиэттиһэн,

         Күөх унаар халлааммын

         Сибэккинэн киэргэтиий.

 

Үөрэ сылдьыахха

 Тэтэркэй сибэкки

Күн тула күлэр

Нуоҕайар күөх лабаа

Далбаатыы үөрэр.

         Күн! Күн! Күн сирэ!

         Чэлгийэ көҕөр.

         Өрүүтүн бу курдук

         Үөрэ сылдьыахха.

Нап-нарын ньургуһун

Саас эмиэ тыллар.

Күөгэйэр күөх сирэм

Чэлгийэ үөрэр.

        Х/ы

Күлүмнэс күн сирэ

Эйэни таптыыр.

Эйэҕэс оҕо саас

Мичээрдии үөрэр.

       

Ийэкэм, эн баар буолан…

 Олоҕу дириҥник таптыырга,

Сырдык күн күлэрин көрөргө,

Дьоллоохтук мичээрдии үөрэргэ

Үөрэттиҥ эн миигин, ийэкэм!

         Күөх лабаа суугунуу хамсыырын

         Дьэрэкээн сибэкки күлэрин

         Айылҕа кэрэчээн көстүүтүн

         Көрдөрдүҥ эн миэхэ, ийэкэм!

Ыраахха ыҥырар сулуска

Дьулуһан, хатаастан иһэрбэр,

Олоххо дьулуурдаах буоларбар

Үөрэттиҥ эн миигин, ийэкэм!

         Ийэкэм, эн баар буолаҥҥын

         Айылҕа кэрэтин таптыыбын.

         Ийэ дойдубар тапталы, эйэни

         Эн миэхэ иҥэрбит эбиккин.

Ол иһин биир тылы этэммин

Ырыаҕа ыллыахпын баҕардым.

Бар дьонум! Көмүскээҥ эйэни,

Сир ийэни киэргэтэр бу күүһү!

 

Мин үөрэбин

 Сибэккилэр нуоҕаһаннар

Сөрүүн тыалтан уһукталлар.

Сибэккилэр тэтэрэннэр

Дьону үөрдэн киэркэйэллэр.

         Мин үөрэбин, мин үөрэбин

         Сибэккилиин сипсиһэрбэр,

         Сибэккилиин сиэттиһэрбэр.

Күөлүм ньуура  өссө тупсан,

Халлаан өҥүн иҥэриннэ.

Күнүн уотун күлүмнэтэн,

Сырдыы, үөрэ нэлэһийдэ.

         Мин үөрэбин, мин үөрэбин

         Күөх сайыҥҥа сөтүөлүүрбэр

         Күөлүм ньуурун таптыырбар.

Алаас уҥуор хатыҥнарбыт

Кийиит кыыстыы кылбаһаллар,

Күөх лабаанан далбаатаһан

Долгулдьуһа нуоҕаһаллар.

         Мин үөрэбин, мин үөрэбин

         Хатыҥ ырыатын истэрбэр,

         Хатыҥ чараҥҥа хаамарбар.

Ырып-чырып чыычаахтарбыт

Хатыҥчааҥҥа олордулар.

Дьикти, кэрэ музыканан

Айылҕаны ыллаттылар.

         Мин үөрэбин, мин үөрэбин

         Чыычаахтардыын ыллыырбар,

         Чыычаах ырыатын истэрбэр.

 

Көмүс дорҕоон кутуллар

Хормейстер Светлана Сергеевна Гоголева сырдык кэриэһигэр.

 Кутуллар мин хоспор музыка

Кэрэтин иһиллэр долгуна.

Дууһабын сэргэхтик, килбиктик

Абылыыр бу нарын лирика.

         Хайдахтаах күүстээҕий музыка!

         Киһини кынаттыыр үөрүүгэ,

         Олоххо дьулуһар санааҕа,

         Сырдыкка сыдьаайар сарыалга.

Бу дьикти эриэккэс дорҕооннор

Тапталы туойаллар ырыанан.

Ийэ сир айылҕа симэҕин

Ситэрэн, киэргэтэн биэрэллэр.

         Оо, ыраас эн кэрэ музыка,

         Эдэргэ эрчимнэ бэлэхтээ!

         Олоҕу дириҥник өйдүүргэ

         Кынаттаа, эн килбик ыччаккын!

 

Кыргыттарбар

 Кэрэчээн кыргыттарым,

Кэрэни эрэ кэрэхсээҥ,

Күндүнү эрэ күндүлээҥ!

Кэрэкэ кыталыктарым,

Кырасыабай кубаларым,

Күндэлэс таас кыырпахтарым,

Кылбаа маҥан сибэккилэрим,

Күндүкэй ыраас тылларынан

Күн-күбэй ийэлэргит үөрдүннэр,

Күн курдук күлүмнэһиҥ!

Куруук күн санааланыҥ

Курулас ардах быйаҥнаныҥ,

Курусуба оһуор киэргэллэниҥ,

Кэрэни олохтон иҥэриниҥ,

Күндүнү эрэ кытта уруурҕаһыҥ!

Күөх долгун лабаалардаах

Куугунас тыаны чэлгитиһиҥ.

Күөх халлаан суһумунан

Күнү кытта мичээрдэһиҥ!

Кытаанах, чөл туруктаныҥ,

Кэхтибэт модун санааланыҥ!

         Кир-хох сыстыбатын,

         Киҥ санаа эҥэрдэспэтин,

         Кыыһырсыы кыйдана турдун,

         Күнүүлэһии күрэнэн бардын!

Кµн Ийэ сылаас тыына

Кууһан ыллын имэрийэ.

Күн сирэ күлэ турдун,

Күннээх халлаан чэмэлийдин!

Көмүс курдук кытаанах,

Кырдьыбат чэбдик доруобуйа.

Кылааттаах дьоһун олоххутун

Кынаттаан үөһэ көтүттүн!

Көтүҥ, көмүс чыычаахтарым

Күҥҥэ үөһэ дьурулаһыҥ.

Кустук кэрэ оһуорунан

Киэргэтиһиҥ Ийэ сири!

Кылбаа ыраас халлааҥҥа

Кыталыктыы кынталдьыһыҥ!

Айгыр-силик айылҕаҕа

Куба буолан долгулдьуһуҥ!

         Кимтэн да куттанымаҥ,

         Куруук үтүө ыраланыҥ.

         Кынаттаах килбик үлэнэн

         Күн–Дьон махталын,

         Күн–Ийэ үөрүүтүн

         Эһиги эрэ билиҥ!

 

ххх

Үөрүөххэ-көтүөххэ бу кэрэ олоххо,

Сылаастык-истиҥник мичээрдии оонньуохха.

Дьиҥ сүрэх үтүөтүн, эриэккэс күндүтүн

Өрүүтүн мичиҥнээн, дьэ ыллыы туойуохха.

 

Баһыыба, сүрэхпит, үөрэри сатыыргар,

Олоҕу дьоллоохтук дуоһуйа ахтаргар,

Бу эдэр сµрэхтэр кистэлэҥ тылларын

Эн таптыыр, харыстыыр, бүөбэйдиир буоларгар.

 

Хаһан да тапталбыт харгыһы билбэтин,

Олохпут үөрүүгэ инники дьулустун.

Күн курдук күлүмнээн, сулустуу мичиҥнээн,

Тапталбыт өрүүтүн чэлгийэ уһуннун!

 

 Сиэнэ кыысчааным Сандаараҕа

 Кып-кыра бэйэкэм үөрэммин

Алааһым киэргэлин көрөбүн.

Ытыспар ыламмын ойуулаан

Күн сырдык чаҕылын тутабын.

 

Кэрэтиэн! Айылҕам киэркэйэн

Сиэдэрэй симэҕин ыспыта.

Күндүтүөн! Олохтон үөрэрбит,

Күн аайы мичээрдээн ыларбыт.

 

Мин эмиэ сибэкки кэриэтэ

Үөрүүнэн бу сиргэ кэлбитим.

Ийэлээх аҕабын дьоллооммун

Олоҕу оһуордаан симиибин.

 

Эбэбин толору үөрдэммин

Үрдүккэ үөрүүтүн тардыһыам.

Эһэбин ситиһии кынаттаан,

Ыраатан сулуска мин көтүөм.

 

Сир дьикти симэҕин быыһыгар

Мин тыыннаах сибэкки курдукпун.

Ол иһин ытыспын уунаммын

Сибэкки ыһыаҕар үөрэбин.

 

Бэс ыйа дьэҥкэрэр кэрэтин

Эһиэхэ утары уунабын.

Хаһан да харыстааҥ Кэрэни,

Киһиэхэ ананар Күндүнү!

 

Розалия Михайловна 1984 сылтан

«Кэскил» суорумньу  кулуубун үлэлэппитэ.

Мин дьол сибэккитин ыһан,

Олоххо үөрүүнү көрдүүрүм.

Ол баҕам эмискэ күүһүрэн,

Туолбута Найахы сиригэр.

 

Мин дьоллоох эбиппин,

Бу сиргэ төрөөммүн,

Эдэр саас тапталын

 Үүннэрэ турарбар.

Олоҕу дириҥник, ыраастык таптыырбар,

Ийэлээх аҕаккам иэйиитин ылбыппар.

 

Мин дьоллоох эбиппин,

Бу сиргэ төрөөммүн,

Айылҕам кэрэтин, киэргэтэ турарбар,

Кэрэни кэрэхсии, күндүнү күндүлүү

Бу сиргэ ананан төрөөбүт олохпор.

 

Мин дьоллоох эбиппин

Тапталы бүөбэйдээн,

Олоххо сырдыгы, кэрэни айарбар,

Күн курдук күлүмнээн, аал уоту отторбор.

Сиэдэрэй сибэкки симэҕин кэтэрбэр.

 

Мин дьоллоох эбиппин

Ыал дьолун түстүүрбэр.

Кинилэр үөрүүлээх күннэрин түмэрбэр,

Уоллаах кыыс оҕонон

Толору дьоллонон

Уйгулаах олоҕу унаарда сыыйарбар.

 

Мин дьоллоох эбиппин

Бу сиргэ төрөөммүн,

Эдэр ыал олоҕун

Кэскилин түстүүрбэр.

Олоҕу салгыырга

Күн көмүс чыычаахтар

Олоххо дьулуһан,

Үрдүккэ көттүннэр.

Сахалыы саргыны

Салайса турдуннар.

Бу сиргэ үөрүүнэн

Олоҕу оһуордаан,

¥йэлээх Тапталы

Үүннэрэ турдуннар!